له ولایتونو څخه د پوهنې خبرونه
هرات
د هرات ولایت د پوهنې رئیس مولوي عبدالله امیني د خپل کار په دفتر کې د هرات ولایت د سرحدونو، قومونو او قبایلو له رئیس الحاج مولوي جمال الدین عمري سره وکتل.
دواړو لورو په دغه ولايت کې د ښوونيزو پروګرامونو د ښه والي او د کوچيانو لپاره د غزنوي ښوونځي د جوړېدو په شمول پر بېلابېلو موضوعاتو خبرې وکړې.
بغلان
د بغلان ولایت د پوهنې رئیس الحاج مولوي محمد نور عزیزي د سویډن موسسې د ښوونې او روزنې له رئیس عبدالحی یعقوبي سره وکتل او په دغه ولایت کې د معلولینو او همدارنګه د نجونو او هلکانو د تعلیم په باب یې ورسره خبرې وکړې.
له همدې ولایت څخه
د بغلان ولایت د ښار د پوهنې آمر مولوي عبدالرقیب حقاني د یاد ولایت د پوهنې ریاست د تعلیمي څارنې له آمر مولوي محمد یاسین زاهد سره یو ځای د حوا، حضرت زاید (رض) او کریم شهید لېسو له اداري چارو څخه څارنه وکړه. د ښوونکو درسي پلانونه، د تدریس لارې چارې او حاضري یې وڅېړله او لازمې لارښوونې یې ورته وکړې.
بل خبر دا، چې د برکه ولسوالۍ د پوهنې آمر حافظ عین الدین رحیمي د تعلیمي څارنې له غړو سره یوځای د بادام دره له منځني ښوونځي څخه لیدنه وکړه او د یاد ښوونځي ښوونکو ته یې د تدریسي مېتودونو او د نصاب د پراختیا په باب لارښوونې وکړې.
د بغلان ولایت د ده صلاح ولسوالۍ د پوهنې آمر مولوي عبدالکریم روحاني د ښوونکو د آزموینې د بهیر د شفافیت او عدالت د تامین په موخه چې په دې وروستیو کې د کریم آقاخان موسسې له خوا د دې ولایت په سنګران عالي لېسه کې پیل شوې وه، لیدنه وکړه.
