له ولایتونو څخه د پوهنې خبرونه
کندهار
د کندهار ولايت د پوهنې رياست چارواکي وايي: د پوهنې رئيس د دې ولايت د مرکز او ولسواليو د پوهنې له آمرینو او ديني عالمانو سره د جلا جلا ناستو په ترڅ کې د مدارسو د نوي تعليمي نصاب، چې په دې وروستیو کې د پوهنې وزارت لخوا چمتو شوي، د پلي کېدو په باب مشورې وکړې.
د مسوولینو په وينا: د كندهار ديني عالمانو د نوي نصاب په باب تر بحث او بيا كتنې وروسته هغه تصويب كړه او د پلي كولو لپاره يې ځانونه ژمن وګڼل.
لغمان
د لغمان ولایت د پوهنې رئیس الحاج مولوي شاه جهان ساجد د بغلان ولایت د حکمونو او فرامینو د تطبیق د څارنې ریاست د کمېټې له استازي سره وکتل. او د پوهنې ریاست د فرامینو او احکامو د عملی کېدو په برخه یې ورسره خبرې وکړې.
پکتیا
د پکتيا ولايت د پوهنې رياست چارواکي وايي: د دې رياست د تعلیمي څارنې کارکوونکي په ښاري حوزه کې د بالا ده له ښوونځي، په احمدآبا ولسوالۍ کې د محمد رحیم له لومړني ښوونځي، په زرمت ولسوالۍ کې د حبيب الله زرمتي له لېسې او په ځدراڼ ولسوالۍ کې د شهید کلي له دارالحفاظ څخه او په احمدخېلو ولسوالۍ کې له حسن خېلو او هزار درخت له ښوونځیو څخه څارنه وکړه. او همدا شان د ښوونیزو چارو د لا ښه والي په موخه یې د یادو ښوونځیو له مدیرانو او ښوونکو سره خبرې او مشورې وکړې.
پکتیا
د پکتیا ولایت د سید کرم ولسوالۍ د پوهنې آمریت د دې ولسوالۍ د ښوونځیو له آمرینو او مدیرانو سره ناسته وکړه او د ښوونیزو او اداري ستونزو په باب یې د بحث ترڅنګ د ښوونځیو ترمنځ د همغږۍ او ګډ کار پر رامنځته کولو ټینګار وکړ.
کاپیسا
د کاپيسا د پوهنې ریاست د ښوونې او روزنې آمر استاد خان آغا هارون د محمود راقي هلکانو لېسې له اداري او تدريسي چارو څخه ليدنه وکړه او زده کوونکي یې زده کړو ته وهڅول.
