په بامیان او دایکنډي ولایتونو کې د نویو ګمارل شویو ښوونکو لپاره معلوماتي سیمینار دایر شو
د بامیان ولایت په مرکز کې د پوهنې وزارت د ښوونکو او روزونکو په حضور کې د نویو ګمارل شویو ښوونکو لپاره د دندو لایحې د تشریح په اړه څلور ورځنی سیمینار ترسره شو، چې پکې د بامیان او دایکنډي ولایتونو ۴۹ تنو ښوونکو ګډون درلود.
د بامیان ولایت پوهنې چارواکو په وینا، د یاد سیمینار اصلي موخه د نویو ګمارل شویو ښوونکو لپاره دندو لایحې اړوند محتوا توضیح کول او د پوهنې د مقرراتو په چوکاټ کې هغوی د خپلو مسلکي دندو له اصولو سره آشنا کول دي.
همدارنګه د "تنویر الافکار" پروګرام هم د عامه پوهاوي لوړولو او د ګډونوالو د مسلکي او ټولنیز لیدلوري پیاوړتیا لپاره طرحه شوی دی.
دغه روزنیز پروګرام به څلور ورځې دوام وکړي او دا په حقیقت کې د بامیان زون په کچه د ظرفیت لوړولو او مسلکي پراختیا پروګرامونو برخه ده.
