په دايکنډي ولايت کې يو باب ښوونځی پرانيستل شو
د دايکنډي ولايت کيتي ولسوالۍ اړوند د شاليزار عالي لېسه د يو لړ مراسمو په ترڅ کې د زده کوونکو پر مخ پرانيستل شوه.
دغه لېسه د ياد ولايت د پوهنې رئيس قاري عنايت الله سهار له لوري، د مسئولينو، علماوو او د سيمې د مخورو په حضور کې په رسمي ډول د پټۍ په پرې کولو سره ګټې اخستنې ته وسپارل شوه.
د دغه لېسې ودانۍ د يو مرستندويه بنسټ له خوا د ۳ ميليونه ۸۸۸ زره ۶۰۰ افغانيو په لګښت جوړه شوې، چې ۶ درسي ټولګي له نورو اړينو ملحقاتو سره لري او په اساسي ډول سره جوړه شوې ده.
د ودانۍ د پرانېستې په مراسمو کې د دايکنډي ولایت پوهنې رئیس د ياد ریاست د راتلونکي پلانونو او پروګرامونو په اړه ګډون والو ته معلومات ورکړل او د لېسې له پرسونل او زده کوونکو څخه یې وغوښتل، چې د خپل ښوونځي د تجهیزاتو ساتنې او ترمیم ته جدي پاملرنه وکړي.
ځايي خلکو هم د خپلو ماشومانو لپاره د زده کړو آسانتياوو په برابرولو کې د پوهنې وزارت له پاملرنې ستاينه وکړه.
مراسم د دعائیې په لوستلو سره پای ته ورسېدل.
