په فاریاب ولایت کې د یوه لومړني ښوونځي ودانۍ لپاره ځمکه ورکړل شوه
د فارياب ولايت د خواجه سبزپوش ولسوالۍ علم دوسته خلکو له لوري، د يادې ولسوالۍ د کوسه قلعه لومړني ښوونځي د جوړولو لپاره، پوهنې رياست ته ٤٧٩٧ متره مربع ځمکه ورکړل شوه.
ویل کېږي، چې یاد ښوونځي له ډېرې مودې راهیسې ودانۍ نه لرله او زده کوونکو یې تر شنه آسمان لاندې په آزاده فضا کې زده کړې کولې.
د یاد ولایت پوهنې رئیس، د دغه ښوونځي لپاره د ځمکې د ورکړې له امله، د کوسه قلعه کلي د خلکو له همکارۍ څخه مننه وکړه او ډاډ یې ورکړ چې د یاد ښوونځي د ودانۍ بیارغونې او ترمیم چارې به، د پوهنې ریاست انکشافي پلان کې شاملې او ژر پیل کړي.
دغه راز نوموړي، ښوونځي ته د ځمکې ورکړه صدقه جاریه وبلله او له نورو هېوادوالو يې هم وغوښتل چې له پوهنې سره مالي او معنوي مرستو ته دوام ورکړي.
