ننګرهار کې د یو ښوونځي ودانۍ ګټې اخیستنې ته وسپارل شوه
د پوهنې وزارت، ننګرهار: د ننګرهار ولایت د چپرهار ولسوالۍ د څیرو لومړني ښوونځي ودانۍ ګټې اخیستنې ته وسپارل شوه.
یاده ودانی په پاخه او اساسي ډول په يو پوړ کې د ولسي تړون د اقرا برنامې لخوا د ۴ میلیونو او ۳۴۵ زره افغانیو په مجموعي لګښت د ۶ میاشتو په موده کې جوړه شوي، چې ۶ درسي ټولګي، د اوبو څاه، ۳ تشنابونه او نورې اړینې آسانتیاوي لري، چې د دغه ښوونځي په جوړېدو سره ۳۲۰ زده کوونکو ته د زده کړو لازم ښوونیز چاپیریال برابر شو.
د ننګرهار د پوهنې رییس حسیب الله شینواري د یاد ښوونځي پر جوړولو خوښي څرګنده کړه او د ښوونځي له ښوونکو، زده کوونکو او د سیمې له اوسېدونکو یی وغوښتل، چې د ودانۍ ساتنې ته ځانګړې پاملرنه وکړي.
