د کندهار له پوهنې ریاست څخه خبرونه
د NRC موسسې سیمه ییز استازي د پنجوايي ولسوالۍ د پوهنې له آمر مولوي محب الله سعادت سره وکتل او د پوهنې په برخه کې یې د لازمو مرستو په باب خبرې وکړې او د همدې ادارې په مالي مرسته یې په یاده ولسوالۍ کې د شیخ بوستان لېسې د بیارغونې چارې پیل کړې.
د کندهار ولایت د ژېړۍ ولسوالۍ د پوهنې آمر مولوي حضرت شاه د دې ولسوالۍ د دیني مدارسو له مسوولینو سره ناسته وکړه.
نوموړي د بېلابېلو ښوونیزو مسايلو د بحث پر مهال له هغوى وغوښتل، چې د يادو بنسټونو پر زده کوونکو د WFP موسسې مرستې په عادلانه او شفاف ډول ووېشل شي.
د کندهار ولايت د تخته پل ولسوالۍ د پوهنې آمر مولوي نعمت الله الفت د دې ولسوالۍ د يو شمېر ښوونځيو له فعاليتونو څخه څارنه وکړه او د جلا جلا غونډو په ترڅ کې يې د يادو ښوونځيو ښوونکي د هېواد د ماشومانو د سالمې روزنې په برخه کې وهڅول.
د نېش ولسوالۍ د پوهنې آمر مولوي عبدالکبير الهام د يادې ولسوالۍ د ښوونځيو له آمرینو، ديني عالمانو او مخورو سره مشورتي ناسته وکړه او د دیني مدارسو او ښوونځيو د شته ستونزو په باب يې ورسره مشورې وکړې او د حل لارې يې ورته ولټولې.
د پوهنې آمر د غونډې له ګډونوالو وغوښتل چې له پوهنې سره دې مرسته وکړي.
د خاکريز ولسوالۍ د پوهنې آمر مولوي عبدالحنان فيضاني د چنار لېسې اداري او تدريسي چارې وڅېړلې او له خلکو يې وغوښتل، چې ښوونځيو او دیني مدارسو ته د خپلو ماشومانو په لېږلو سره له ښوونیزو بنسټونو سره مرستې وکړي.
