د پنجشیر له پوهنې ریاست څخه خبرونه
د پنجشیر ولایت د پوهنې رئیس د آفرین موسسې له رئیس او مل پلاوي سره وکتل.
د پنجشير د پوهنې د رئيس د څرګندونو له مخې: په دې غونډه کې آفرین موسسې ژمنه وکړه چې د دغه ولايت په پيريان ولسوالۍ کې به لس ښوونیز او تقویتي کورسونه جوړ کړي.
د پنجشير ولايت د پوهنې رئيس مولانا غلام ایشان حماس له خپل مل پلاوي سره د رخه ولسوالۍ د سواد زده کړې له آمریت څخه ليدنه وکړه .
نوموړي د سواد زده کړې آمریت له کارکوونکو وغوښتل، چې ورسپارل شوې دندې د اصولو سره سم ترسره کړي او د غفلت او غير حاضرۍ مخه ونيسي.
نوموړي د يادې ادارې ستونزې او وړانديزونه یاداښت کړې او د حل په موخه يې ورته ډاډ ورکړ.
د پنجشیر ولایت د پوهنې ریاست مسوولین وایي: د ا. ا. ا ۱۵۰ تنو مجاهدینو څخه د دغه ولایت د ولي محمد شهید په لېسې کې د سویې ازموینه واخیستله او په نهمو او یوولسمو ټولګیو کې کېنول شول.
د دې ریاست د ښوونې او روزنې آمر رحیم داد نظري په وینا، دا ازموینه د ا. ا. ا د هغو مجاهدینو لپاره ځانګړې شوې وه چې پخوا یې په خصوصي توګه زده کړې کړې وې.
د يو بل خبر له مخې، د پنجشير ولايت د پوهنې رئيس او ورسره مل پلاوي د عنابه ولسوالۍ د بي بي مريم منځني ښوونځي څخه ليدنه وکړه، د دې لېسې د اداري او تدريسي چارو د څارنې ترڅنګ يې د زده کوونکو او ښوونکو ستونزې هم واورېدې او د هغوی ته یې د حل ډاډ ورکړ.
په یو بل خبر کې:
د پنجشير ولايت د پوهنې رئيس مولانا غلام ایشان حماس د دغه ولايت د رخه ولسوالۍ په دشتک کې د ښوونکو د روزنې مرکز له چارو څخه ليدنه او څارنه وکړه .
نوموړي د دغه ښوونیز مرکز اداري او تدریسي چارو ته کتنه وکړه او د ښوونکو د روزنې له مسوولینو او استادانو څخه یې وغوښتل، چې خپلې ټولې کړنې د اصولو سره سم پرمخ یوسي او له غیرحاضرۍ څخه ډډه وکړي.
