له ولایتونو څخه د پوهنې خبرونه
لغمان
د مهترلام ښار د تعلیمي څارنې آمر قاري صدیق الله طارق او ورسره مل پلاوي د کتاب جای عالي لېسې د آمر د معرفي کولو ترڅنګ د روښان لېسې له اداري او تدریسي چارو هم څارنه وکړه.
په دې کتنه کې د ښوونځیو د نظم او ډسپلین د ساتلو او د پوهنې د کیفیت د لوړولو په برخه کې مسوولینو، ښوونکو او زده کوونکو ته لازمې لارښوونې وشوې.
پنجشیر
د پنجشېر ولایت د پوهنې رئیس مولانا غلام ایشان حماس د امیرالمومنین د فرمان پر اساس له خپل موټر او د دې ریاست د کارکوونکو له موټرو څخه تورې ښېښې لري کړې. او له ټولو یې وغوښتل ترڅو دا کار ترسره کړي.
جوزجان
د جوزجان ولايت د پوهنې رئيس مولوي محمدطاهر جواد د يوه کاري سفر په ترڅ کې د دغه ولايت د رزاب ولسوالۍ لرو پرتو ښوونځيو او دیني مدارسو ته لاړ او د دغې ولسوالۍ د ښوونځيو او دیني مدارسو د ښوونيزو فعاليتونو څخه يې څارنه وکړه .
نوموړي زياته کړه: د دې سفر موخه د پوهنې ریاست او د درزاب ولسوالۍ د سپین ږیرو، کليوالو او اوسېدونکو ترمنځ همکارۍ او همغږۍ رامنځته کول وو.
نورستان
د نورستان ولايت د پوهنې رياست وايي: په دې وروستيو کې د برګمټال ولسوالۍ د نيک موک په کلي کې يو منځنى ښوونځى چې کلونه کلونه پوځيانو ترې ګټه پورته کوله، بېرته د زده کړو په مرکز بدل شوی او اوس د دغه ځاى ماشومان زده کړې پکې کوي.
سرپل
د سرپل ولایت د پوهنې رئیس مولوي محمد رحماني د دغه ولایت د کوهستانات ولسوالۍ د یو شمېر ښوونځیو له مدیرانو او ښوونکو سره د یوې کاري غونډې په ترڅ کې هغوی ته لارښوونه وکړه، چې د پوهنې د کیفیت د لوړولو په برخه کې دې لا زیات کار وکړي.
نوموړي دغه راز له علماوو او د زده کوونکو له والدينو وغوښتل، چې په ښوونځيو کې د خپلو ماشومانو شاملولو سره له پوهنې سره همکاري وکړي.
