له ولایتونو څخه د پوهنې خبرونه
غزني
د ګيلان ولسوالۍ د پوهنې آمر مولوي نعمت الله شاکر د يادې ولسوالۍ د خصوصي مدارسو، دارالحفاظونو او يتيم خانو له مديرانو او مسوولینو سره ناسته وکړه او په ښوونیز ډګر کې یې د لوړو مقاماتو د فرمانونو او ښوونیز نصاب د پلي کېدو په هکله خبرې وکړې.
په پای کې د غونډې ګډونوالو ته قرطاسیې او قرآن کریم ووېشل شول.
د يو بل خبر له مخې
په ګيلان ولسوالۍ کې د يوه خصوصي ښوونځي د بنسټ ډبره کېښودل شوه.
د ياد ښوونځي د پرانيستې په مراسمو کې د پوهنې آمریت مسوولينو، ديني عالمانو او يو شمېر اوسېدونکو برخه اخيستې وه.
د غزني ولایت د ناور ولسوالۍ د پوهنې آمر مولوي قدرت الله جلالزي د همدې ولسوالۍ په يوه ولسي غونډه کې د ګډون په ترڅ کې له ګډونوالو وغوښتل، چې ښوونځیو او دیني مدارسو ته د خپلو ماشومانو په لېږلو سره له پوهنې سره مرسته وکړي.
لغمان
د لغمان ولایت د پوهنې رئیس مولوي شاه جهان ساجد د یوې کاري ناستې په ترڅ کې د دغه ریاست د بېلابېلو څانګو له آمرینو او مدیرانو سره د سږني کال د کلنیو ازموینو د ترسره کېدو د برنامې په باب بحث او خبرې وکړې.
د پوهنې رئيس د غونډې له ګډونوالو وغوښتل، چې د يادو ازموينو لپاره لا له وړاندې لازم تدابير ونيسي، ترڅو د شته ستونزو مخه ونیول شي.
د الیشنګ ولسوالۍ د تعلیمي څارنې غړو د نجیل کلي، دورې، احمدخان صافي او د میا عبدالکریم ښوونځیو څخه لیدنه وکړه او د یادو ښوونځیو له مدیرانو او ښوونکو سره یې د یو شمېر ستونزو د حل په موخه خبرې وکړې.
