په فراه ولایت کې د یوه ښوونځي د بنسټ ډبره کېښودل شوه
د فراه ولایت د بکواه ولسوالۍ د شېرسرخ لومړني ښوونځي د بنسټ ډبره د یو لړ مراسمو په ترڅ کې د یادې ولسوالۍ د پوهنې آمر عبدالاحد هادي، د پوهنې مسئولینو، علماوو، ولسي مشرانو، ښوونکو، زده کوونکو په حضور کې کېښودل شوه.
په مراسمو کې د يادې ولسوالۍ د پوهنې آمر د ښوونځي د بيارغونې له امله خوښي وښوده او د سیمې له خلکو يې وغوښتل چې خپل ماشومان ښوونځيو ته واستوي.
نوموړي همداراز زده کوونکو ته وویل چې د ښوونځي د وسايلو په ساتنه کې دې جدي پاملرنه وکړي.
د يادونې وړ ده، چې د ياد ښوونځي پر ودانۍ او حلقوي دیوال شاوخوا دوه ميليونه او ۵۰۰ زره افغانۍ لګښت راځي، چې د يوې مرستندويه بنسټ د سیمه ییز دفتر له لوري ورکول کېږي.
ياد ښوونځی تر ٢٨٠ تنو ډېر زده کوونکي لري چې په ازاده فضا کې په زده کړو بوخت دي.
