د هېواد د شېعه علماوو یوه پلاوي له پوهنې وزارت سرپرست الحاج مولوي حبيب الله آغا سره وکتل
په پیل کې د پوهنې وزارت سرپرست راغلي پلاوي ته ښه راغلاست ووایه او ويې وويل، هغه ملتونه چې د ملي یووالي روحیه لري د هغو په پرتله چې دا نعمت نه لري، آرام او باعزته ژوند لري.
د پوهنې وزارت سرپرست زیاته کړه؛ د ياد وزارت رهبري ژمنه ده، چې د هېواد بچیانو لپاره د پیاوړي او متوازن ښوونیز نظام په رامنځته کولو سره راتلونکی نسل د پوهنې له نعمت څخه برخمن او په دې لاره کې به له هېڅ راز هڅې څخه درېغ ونه کړي.
ورپسې دشېعه علماوو د شورا مرستيال استاد اکبري په خپلو سیمو کې د ښوونې او روزنې په برخه کې یو لړ وړاندیزونه او ستونزې د پوهنې وزارت له سرپرست سره شریکې کړې او د پوهنې وزارت د پلانونو، پروګرامونو او د ښوونې او روزنې د بهیر د پراختیا په برخه کې یې خپل ملاتړ څرګند کړ.
غونډه د دعائیې په لوستلو سره پای ته ورسېده.
