د ولایتونو پوهنې خبرونو ته لنډه کتنه

بلخ
د پوهنې وزارت د معلوماتو او احصائیې رئیس مولوي بسم الله نعماني په داسې حال کې چې د بلخ ولایت پوهنې رئیس الحاج مولوي عبدالجلیل شهیدخېل یې ملتیا کوله، د یاد ولایت نهرشاهي ولسوالۍ د پوهنې آمریت له احصائیوي سیمینار څخه لیدنه وکړه.
دغه راز نوموړي د سیمینار ګډون وال د اداري وړتیاوو لوړولوته وهڅول او له هغوی یې وغوښتل، تر څو له خپلو ښوونیزو وړتیاوو څخه په ورځنیو چارو کې ګټه واخلي.

هرات
د هرات ولایت پوهنې رئیس مولوي رحمت الله جابر، د یاد ولايت د ځينو خيريه بنسټونو له مسئولينو سره د کتنې پر مهال، د پوهنې رياست او خيريه بنسټونو ترمنځ د همغږۍ پر رامنځته کولو ټينګار وکړ.
په دې کتنه کې د خیریه بنسټونو استازو د هرات پوهنې ریاست د کړنو او خدمتونو د بیانولو په ترڅ کې، د دوی له همکارۍ مننه وکړه او د خپلو مرستو پر دوام یې ټینګار وکړ.

سرپل
د یو مرستندویه خیریه بنسټ په مالي مرسته، د سیمه ییزو ټولګیو څخه ۲۹۷ تنه زده کوونکي فارغ او د خپلو زده کړو د دوام په موخه، د سرپل ولایت پوهنې ریاست ته ور وپېژندل شول.
  
لغمان
د لغمان ولایت پوهنې ریاست له پاکستان څخه د ۵۰ راستنو شویو کډوالو زده کوونکو څخه د سویې د تثبیت آزموینه واخیسته، ترڅو د دوی له سویې سره سم ټولګیو کې د شاملولو په موخه، بېلابېلو ښوونځیو ته ور وپېژندل شي.

لوګر
د لوګر ولایت پوهنې ریاست کې د ۱۴۰۳ ه ش کال په کانکور آزموینه کې د ګډون په موخه، د نوم لیکنې بهیر پیل شو.