په فراه ولايت کې دوه بابه ښوونځي فعال شول
د فراه ولایت ګلستان ولسوالۍ اړوند په تیلي کمند او سیا کوشي کلیو کې ۲ بابه لومړني ښوونځي چې له کلونو راهیسې غیرفعال وو، د یادې سیمې د ځایي خلکو د غوښتنې په پایله کې د پوهنې وزارت له لوري بیاځلې فعال او د زده کوونکو پر مخ خلاص شول.
د فراه ولايت پوهنې رياست مشرتابه د يادې ولسوالۍ له اوسېدونکو وغوښتل، چې د پوهنې د پياوړتيا او پرمختګ لپاره لازياتې هڅې وکړي او خپل اولادونه د علم او پوهې ترلاسه کولو ته وهڅوي.
د سیمې اوسېدونکو د خپلو بچیانو لپاره د زده کړو د آسانتیا د برابرېدلو له امله د پوهنې وزارت له مشرتابه څخه مننه او قدرداني وکړه،
د يادونې وړ ده، چې د يادو لومړنيو ښوونځيو په بيا ځلې فعالېدو سره شاوخوا ۹۰۰ تنو ماشومانو ته د زده کړو آسانتیا برابره شوه.
