د اروزګان ولایت په ښوونځیو کې یو شمېر پروژې بشپړې شوې
د یو همکار بنسټ له لوري د ۵۳ ميليونه ۵۱۹ زره ۵۳۷ افغانیو په لګښت، داروزګان ولایت په مرکز ترينکوټ، چورې، چنارتو، خاص اروزګان، ګيزاب، دهراوود او چهارچينو ولسواليو په اړوندو ښوونځيو کې شاوخوا لس پروژې پیل شوې وې، چې او سمهال د یادو پروژو له جملې څخه د وزیرخان، د نجونو ابتدائیه او د چورې ولسوالۍ د عایشه زایي په ښوونځيو کې د درې بابه پروژو چارې بشپړې او ګټې اخیستنې ته وسپارل شوې.
په یادو پروژو کې د لمریزې برېښنا سیسټم نصبول، د پاکو اوبو څاګانو کیندل، د اوبو رسولو سیسټم غځول او د نورو اړینو ملحقاتو جوړول شامل دي.
د پوهنې وزارت مشرتابه د ښوونیز نظام د ملاتړ په برخه کې د مرسته کوونکو بنسټونو او د پوهنې دوستو خلکو له همکارۍ څخه هرکلی کوي او د هېواد ماشومانو لپاره یې د پوهنیزو او تحصیلي آسانتیاوو د رامنځته کولو په برخه کې د دا ډول مرستو پر دوام ټینګار وکړ.
