دلومړي ځل لپاره په میدان وردګو کې الکترونیکي شهادتنامې په زده کوونکو وویشل شوي
د پوهنې وزارت ـ میدان وردګ: د میدان وردګو ولایت د پوهنې رياست لخوا د هېواد په کچه د لومړي ځل لپاره دولسم ټولګي فارغينو ته الکترونیکي شهادت نامې ورکړل شوې.
هغه غونډه چې په همدې تړاو جوړه شوي وه، د میدان وردګو والي دګر جنرال مظفرالدین یمین د پوهنې له رییس او ټولو مسؤلینو څخه د دوی د ښو کړنو او فعالیتونو په تړاو مننه وکړه، چې د پوهنې په ډګر کې یې له زده کوونکو سره په هر ډول حالاتو کې خپله مينه او اخلاص نه دی سپمولی اوفارغینو ته يي د دوي د فراغت مبارکي وويله.
همدارنګه د میدان وردګ ولایت د پوهنې رییس دوکتور محمد سعید منصور وويل: د برښنایي شهادت نامو ویاړ او ابتکار د هېواد په کچه د میدان وردګو پوهنې ریاست خپل کړ. هغه زیاته کړه: د برښنایي شهادت نامو ابتکار یې د کابل پوهنې ریاست کې ددندې په مهال پیل کړی و، چې تراوسه هلته بشپړ شوي ندی، د خوشالۍ ځای دی، چې برښنایي شهادت نامو وېش د هېواد په کچه میدان وردګو پوهنې ریاست کې بشپړ او په فارغو زده کوونکو باندې ووېشل شوې.
