د پوهنې وزارت د اسلامي تعلیماتو په معینیت کې د هیواد د تعلیمي ادارو د نظارت په اړه غونډه ترسره شوه
یاد غونډه چې د قرآن عظیم الشان د څو مبارکو ایاتونو په تلاوت سره پیل شوه، لومړی د اسلامي تعلیماتو معین الحاج مولوي کرامت الله اخندزاده وینا وکړه او په خپله وینا کې یې د اسلامي تعلیماتو د معینیت د نظارت مسئولینو او کارمندانو ته د هغوی دندې مشخصې کړې او سپارښتنه یې ورته وکړه چې په خپلو اړوندو چارو کې له پوره اخلاص څخه کار واخلي، غفلت ونه کړي، په ټولو اړوندو تدریسي او اداري برخو کې په پوره دقت سره معلومات او ارقام را غونډ کړي، خیالې ادارې او بستونه مشخص کړي.
ورپسې د اسلامي تعلیماتو معینیت د استعدادونو د ارزیابي رئیس مفتي عبدالولي سداد او د مدارسو او درالحفاظونو رئیس مولوي عبدالرزاق صدیق د موضوع په اړه ویناوې وکړې او د نظارت مسئولین او کارمندان یې خپلو دندو ته متوجه کړل. په پای کې د نظارت د آمر ګدا محمد مفلح له لوري د پروجکتور په وسیله د نظارت عملیاتي پلان د غونډې ګډون والو ته تشریح شو.
