د لوګر په بره کي برک ولسوالۍ کې د پوهنې بهیر په ملاتړ غونډه جوړه شوه
د پوهنې وزارت، لوګر: د لوګر په بره کي برک ولسوالۍ کې د پوهنې بهیر په ملاتړ او د نجونو د تړل شویو ښوونځیو د بیا فعالولو په موخه غونډه جوړه شوه.
یاده غونډه د پوهنې ریاست د لارښوونې له مخې د ښوونځیو شوراګانو د مدیریت له خوا جوړه شوې وه، چې شاوخوا ۶۰ دیني عالمانو او قومي مشرانو پکې برخه اخیستې وه.
په یاده غونډه کې له دیني عالمانو او قومي مشرانو سره د پوهنې بهیر په ملاتړ او د نجونو د زده کړو پر وړاندې د شته خنډونو د له منځه وړلو په اړه سلا مشورې وشوې. د یادې ولسوالۍ دیني عالمانو او قومي مشرانو د پوهنې له بهیره خپل ملاتړ څرګند کړ او زیاته یې کړه، چې دوی به د نجونو زده کړو پر وړاندې شته خنډونه له منځه وړي. هغوی په دې ولسوالۍ کې د نجونو د زده کړو پر وړاندې د خنډونو پای ته رسولو غوښتنه وکړه او ویې ویل، چې دوی به دغه غږ د ممبرونو له لارې خلکو ته رسوي.
یادو دیني عالمانو او قومي مشرانو د هلکانو په څېر نجونې هم د تعلیم حقدارې وبللې او پر والدنیو یې غږ وکړ، چې د زامنو تر څنګ خپلې لوڼې هم ښوونځیو ته ولېږي. غونډې ته د وینا پر مهال یوه دیني عالم وویل، هېڅوک باید د ښځو د تعلیم مخه ونه نیسي او دوی د ممبرونو له لارې دغه مسئله خلکو ته واضح کړې، چې تعلیم فرض دی.
د لوګر د پوهنې ریاست د پوهنې بهیر په ملاتړ او د نجونو د تړل شویو ښوونځیو د بیا فعالولو هڅې چټکې کړي، چې په نژدې ورځو کې به د پوهنې بهیر په ملاتړ او د نجونو د زده کړو پر وړاندې د شته خنډونو د له منځه وړلو لپاره یوه لویه غونډه هم جوړه کړي.
