د پوهنې وزارت او د المپیک، بدني روزنې او سپورټ لوی ریاست ترمنځ د دوهاخیزه همکاریو ګډ هوکړهلیک لاسلیک شو
د پوهنې وزارت او د المپیک، بدني روزنې او سپورټ لوی ریاست ترمنځ د ښوونیزو مرکزونو په کچه د سپورټ ودې لپاره د ګډو همکاریو هوکړهلیک لاسلیک شو.
د هوکړهلیک په مراسمو کې د پوهنې وزارت د ښوونې او روزنې معین محترم شیخ عبدالمالک حقاني، د المپیک، بدني روزنې او سپورټ لوی رئیس محترم مولوي احمدالله وثیق، مسئولینو او د دواړو ادارو یو شمېر کلیدي غړو ګډون درلود.
په پيل کې د هېواد د المپیک، بدني روزنې او سپورټ محترم لوی رئیس د پوهنې وزارت پلاوي ته د ښه راغلاست ترڅنګ وویل چې، له دغه هوکړهلیک څخه یې بنسټیزه موخه، په دیني مدارسو او ښوونځیو کې د ځوانانو د روغتیا، جسمي پیاوړتیا او ذهني ودې لپاره زمینه برابرول دي.
ورپسې د پوهنې وزارت د ښوونې او روزنې محترم معین د بدني روزنې پر ارزښت هراړخیزې خبرې وکړې او څرګنده یې کړه چې د سپورټ اداره په نړۍواله کچه د اسلامي ارزښتونو او کلتور د پېژندګلوۍ په لاره کې مهم او اغېزناک رول لري.
نوموړي ژمنه وکړه، چې دواړې ادارې به د طلابو او زدهکوونکو د ښوونې، روزنې او سپورټي فعالیتونو لاپراختیا لپاره ګډې هڅې کوي.
د یاد هوکړهلیک له مخې به، په دیني مدارسو او ښوونځیو کې د طلابو او زدهکوونکو لپاره سپورټي پروګرامونه، سیالۍ او روزنیز سمینارونه پلي کېږي، ترڅو د ځوانانو د ذهني او بدني پیاوړتیا سبب وګرځي.
