لغمان کې ښوونکو ته روزنیز ورکشاپ جوړ شو
د پوهنې وزارت_لغمان: د لغمان ولایت مرکز او ولسوالیو د کلیوالي ټولګیو ۴۵ تنو ښوونکو ته د اصول صنفی تشریح تر نامه لاندې د ظرفیت لوړونې لس ورځنۍ ورکشاپ د روشان په عالي لیسي کې جوړ شو.
دغه ورکشاپ د یونیسف موسسې له لوري جوړ شوی، چې د محلي زده کړو ښوونکو ته به د علمي او مسلکي ظرفیت لوړونې،د درسي میتودونو د زده کړې او د نویو ښوونیزو مېتودونو په اړه به ګډونوالو ته لازم مالومات ورکړل شي.
د لغمان د پوهنې ریاست مالی او اداری مرستیال ګډونوالو ته وویل چې له دې فرصت څخه د سالمې استفادې تر څنګ د درسي کیفیت ته هم زیاته توجه وشي او هم یې له استادانو غوښتنه وکړه چې په ټاکلي وخت زده کړو ته دوام ورکړي .
نوموړي زیاته کړه، چې د یونیسف او نورو همکارو موسسو په مرسته به د یادو روزنیزو ورکشاپونو لړۍ د لغمان ولایت نورو سیمو ته هم وغځوي، چې پرمټ به یې ګڼ شمېر ښوونکي له مسلکي ښوونې او روزنې برخمن شي
