له شاوخوا ١٠٠ تنو م/جاهدينو څخه د سويې د تثبيت ازموينه واخيستل شوه
د پوهنې وزارت د ځانګړې قانوني کړنلارې پر بنسټ، د کابل ښار سيدجمال الدين افغان عالي دارالمعلمين په تالار کې له شاوخوا ١٠٠ تنو م/جاهدینو څخه د سويې د تثبیت ازموینه واخیستل شوه.
د پوهنې وزارت د ازموینې کمېټې رئیس، محترم مولوي عبدالواحد واحدیار وویل: دغه نوماندان د ج/هادي بوختیاوو له امله له زده کړو پاتې شوي وو; خو اوس ورته زمینه برابره شوې چې خپلې نیمګړې زده کړې بشپړې کړي.
نوموړي زیاته کړه، هغه کسان چې په دې ازموینه کې بریالي شي، د خپلې سويې مطابق به د هېواد د رسمي ښوونځیو له آتم تر دولسمو ټولګیو کې شامل شي.
د ازموینې ګډون والو د دغې پروسې هرکلی وکړ او له نورو کسانو يې هم وغوښتل چې له ورته فرصتونو څخه ګټه پورته او خپلو زده کړو ته دوام ورکړي.
دا په داسې حال کې ده چې له دې وړاندې هم د پوهنې وزارت له لوري د سلګونو م/جاهدینو او راستنېدونکو کډوالو څخه ازموینې اخیستل شوې او هغوی د زده کړو بهیر ته شامل شوي دي.
