له ولایتونو څخه د پوهنې خبرونو ته یوه کتنه
پنجشېر
د پنجشېر ولايت پوهنې رئيس د باد قل بازارک د هلکانو لېسې په اداري غونډه کې، د باکيفيته زده کړو او په هېواد کې د ښوونيز نظام د پراختيا غوښتنه وکړه او له ټولو مسئولينو يې وغوښتل، چې په دې برخه کې د پوهنې وزارت د رهبرۍ لارښوونې او کړنلارې په پام کې ونیسي.
بغلان
د بغلان پوهنې ریاست د ۴ خالي بستونو د ډکولو په موخه، له ۳۲ نوماندانو څخه آزموینه واخیسته.
په پام کې ده، له دوی څخه څلور تنه یې چې معیاري نمرې ترلاسه کړي په یادو بستونو کې به د قرار دادي کارکوونکو په توګه وګمارل شي.
د یوه بل خبر له مخې:
د بغلان ولایت پوهنې رئیس الحاج مولوي محمد نور عزیزي، د یاد ولایت له شېعه مذهبه مشرانو سره وکتل.
په دې کتنه کې مشرانو د خپلو ماشومانو د زده کړې پر ستونزو خبرې وکړې او په دې برخه کې يې د همکارۍ غوښتنه وکړه.
نورستان
د نورستان پوهنې ریاست د پلټنې پلاوی د یاد ولایت د برګمټال ولسوالۍ ته ولاړ تر څو هلته د پوهنې ریاست او ښوونځیو د ۱۴۰۱ او ۱۴۰۲ کلونو فعالیتونه وڅېړي او پایلې یې د یاد ریاست له مشرتابه سره شریکې کړي.
لغمان
د لغمان ولایت پوهنې رئیس مولوي شاه جهان ساجد د پوهنې په برخه کې د یوه همکار بنسټ له استازو سره وکتل .
په یاده کتنه کې د ۲۰ ښوونځیو پروژو د پیل او څرنګوالي په اړه تفصیلي خبرې وشوې.
