له ولایتونو څخه د پوهنې لنډ خبرونه
نیمروز
د پوهنې وزارت د پلان او پالیسۍ ریاست درې کسیز پلاوي نیمروز ولایت ته د پوهنې ریاست د تعلیمي ادارو د بستونو د عادلانه وېش د ترتیبولو او ډکولو په موخه سفر وکړ او د دغه ریاست د عمومي زده کړو له آمر مولوي ګلبدین شریفي سره یې د پوهنې ریاست او د خپلو پلانونو په باب غونډه وکړه.
ننګرهار
د ننګرهار ولایت د پوهنې ریاست د JACK موسسې په مرسته د سواد زده کړې د ټولګیو په ګډون ۷۰ تنو نویو ښوونکو ته لس ورځنی میتودیک سیمینار جوړ کړ. ټاکل شوې دغه ښوونکي د ياد شوي روزنيز کورس له بشپړولو وروسته په حصارک، خوګياڼو، اچين، نازيانو، دوربابا، لعلپورې او مومندرې ولسواليو کې د سواد زده کړې د ټولګيو د ښوونکو په توګه خپل فعاليت پيل کړي.
خوست
د خوست ولايت يو شمېر روڼ اندو ځوانو د درسي کتابونو د راټولولو د کمپاين په ترڅ کې له کورونو او کليو څخه ۱۱۰۰ ټوکه کتابونه راټول او د زده کوونکو د ګټې اخیستنې په موخه يې د دغه ولايت پوهنې رياست ته وسپارلې، چې د دوی دغه کار د خلکو او د چارواکو له تود هرکلي سره مخ شو.
لوګر
د پوهنې وزارت د اسلامي زده کړو معینیت د لوګر ولایت د برکي برک ولسوالۍ له ۲۵ بابه لیلیه لرونکو مدارسو سره نغدي مرسته وکړه.
د لوګر د پوهنې د مسوولینو په خبره: د اسلامي زده کړو معینیت د لومړۍ درجې مدارسو ته ۱۴ زره افغانۍ، د دویمې درجې مدارسو ته ۱۲ زره او د دریمې درجې مدارسو ته ۱۰ زره افغانۍ ووېشلې، ترڅو په اړینو مواردو کې ولګول شي.
بلخ
د دعوت او ارشاد اونيز درسونه د مارمل ولسوالۍ د پوهنې آمریت او د دعوت او ارشاد د مبلغ مولوي حبيب الله حميدي له خوا د قرآن عظيم الشان د ځانګړتياوو، د فضیلت او پر وړاندې یې د مسلمانانو د مسووليت په باب معلومات ورکړل شول.
