له ولایتونو څخه د پوهنې لنډ خبرونه
بلخ
د بلخ ولایت پوهنې ریاست د اړتیا وړ ۳۷ قلمه توکو د داوطلبۍ غونډه، د یاد ولایت د پوهنې له مسئولینو او د خصوصي شرکتونو استازو ترمنځ جوړه شوه. ګټونکی شرکت به د مرکزي څانګو او ولسوالیو د معارف د اړتیا وړ دفتري وسایل، فرشونه او برېښنایی وسایل چمتو کړي.
غزني
د غزني ولایت پوهنې رئیس د اړوندو ادارو له مسئولینو او استازو سره په کتنه کې، د خصوصي ښوونځیو او کورسونو اداري او ښوونیز فعالیتونه وڅېړل او د یادو مرکزونو له مسئولینو یې وغوښتل، چې خپل فعالیتونه د پوهنې وزارت له کړنلارې سره سم ترسره کړي.
پنجشېر
د پنجشېر ولایت پوهنې ریاست اداري غونډه د پوهنې رئیس مولوي غلام ایشان حماس په مشرۍ ترسره شوه او په یاده غونډه کې د پوهنې د ستونزو د حل، دکاروکونکو ترمنځ پر همغږۍ، دمراجعینو سره د نېک چلند، د پوهنې بهیر پر چټکتیا او د تدریس د کیفیت پر لوړولو خبرې وشوې.
همدارنګه، د اسلامي زده کړو بنسټونو ته د ۱۶۱ نویو بستونو ورکول او د یاد ولایت په خصوصي او کلیوالي مدارسو کې د ۷۷ نویو استادانو ګمارل د غونډې د اجنډا له نورو موضوعاتو څخه وو.
لغمان
د لغمان ولایت پوهنې رئیس مولوي شاه جهان ساجد او د یاد ریاست د انجینرۍ ټېم په ښوونځیو کې د حفظ الصحې د ۱۲ پروژو د کار له پرمختګ څخه لیدنه وکړه چې د یوه مرستندویه بنسټ په مرسته پرې کار روان دی او له قراردادي شرکت څخه یې وغوښتل. چې خپل کارونه د پلان سره سم ترسره کړي.
کاپیسا
د کاپیسا ولایت پوهنې ریاست د ښوونې او روزنې آمر، د یاد ولایت د سیمه ییزو او چټکو زده کړو د ټولګیو د اداري شورا غړو له درۍ ورځني ورکشاپ څخه، چې د محمود راقي د نارینه وو په لېسه کې جوړ شوی و، لیدنه وکړه.
