په تخار ولایت کې د سواد زده کړې له کورسونو څخه امنیتي منسوبین فارغ شول
د تخار ولایت اړوند ۱۱۶ تنه امنیتي منسوبین د یاد ولایت د امنیې قوماندانۍ د سواد زده کړې له کورسونو «لیک لوست زده کړې» له ۹ میاشتني کورس څخه فارغ شول.
د یادو امنیتي منسوبینو د فراغت په مراسمو کې د ولایت مرستیال، د پوهنې، امر باالمعروف او نهي عن المنکر رئيسانو، امنیې قوماندان او د تخار ولایت یو شمېر سیمه ییزو چارواکو ګډون درلود.
په غونډه کې مسئولینو او علماوو د خپلو خبرو په ترڅ کې، د سواد زده کړه د ټولنې د وګړو لپاره خورا مهمه وبلله او په ياده برخه کې یې ځوانان وهڅول.
د تخار پوهنې رياست مشرتابه ژمنه وکړه، چې له مسئولينو سره به د امنیتي منسوبینو لپاره د سواد زده کړې په تړاو د لازياتو ښوونيزو چوپړونو وړاندې کولو په برخه کې همکاري وکړي.