په زابل ولایت کې د یو باب ښوونځي د ودانۍ بنسټ ډبره کېښودل شوه
د زابل ولایت شاهجوې ولسوالۍ اړوند د چینو سیمې په "هولان رباط" کلي کې د یو باب نوي لومړني ښوونځي د ودانۍ بنسټ ډبره د ځانګړو مراسمو په ترڅ کې کېښودل شوه.
د یادې ودانۍ د جوړېدو لګښت شاوخوا ۶۰۰ زره افغانۍ اټکل شوی، چې د سیمې د ښوونځیو شورا او ځایي خلکو له لوري ورکول کېږي.
د بنسټډبرې اېښودلو په مراسمو کې د شاهجوې ولسوالۍ پوهنې مسئولینو، ښوونکو، زدهکوونکو، د سیمې مشرانو او د خلکو استازو ګډون درلود.
مسئولینو په خپلو خبرو کې د تعلیم پر ارزښت ټینګار وکړ او د پوهنې په برخه کې یې د خلکو له مرستې او ملاتړ څخه مننه وکړه.
یاده ودانۍ به ۶ درسي ټولګي، یوه اداري خونه او نور اړین تاسیسات ولري، چې د علمدوسته خلکو له خوا پوهنې ته په وقف شوې ۵ جرېبه ځمکه باندې رغول کېږي.
د شاهجوې ولسوالۍ پوهنې مسئولینو په وینا، د یادې ودانۍ پر بشپړېدو سره به له ۴۰۰ تنو زیاتو زدهکوونکو ته یو معیاري، خوندي او مناسب تعلیمي چاپېریال برابر شي.
