په میدان وردګ ولایت کې د یو محراب جومات د بنسټ ډبره کېښودل شوه
د ميدان وردګ ولايت نرخ ولسوالۍ اړوند په "بادام" سيمه کې د يو محراب جومات د بنسټ ډبره، د پوهنې رياست مشرتابه، د سيمه ييزو ادارو د مسئولينو، قومي مشرانو او علماوو په حضور کې کېښودل شوه.
ټاکل شوې ده، چې ياد جومات د سيمې د اوسېدونکو له لوري د اصحاب الصفه دارالعلوم ته څېرمه په يو جرېب ځمکه کې جوړ شي.
د نرخ ولسوالۍ د اصحاب الصفه دارالعلوم مسئولينو او طلابو د دغه جومات د ځمکې د ورکړې او د لګښت په ورکولو کې د ځايي خلکو له مرستو څخه ستاينه وکړه او دغه مرسته يې د اسلام د ستر لارښود حضرت محمد (صلى الله عليه وسلم) د مبارک حديث په استناد د صدقه جاريه نېکو اعمالو څخه وبلله.
د مسئولينو په ويناء، ډېر ژر به د ياد جومات د جوړېدو چارې پيل شي.
د دغه جومات د بنسټ مراسم د دعائيې په لوستلو سره پای ته ورسېدل.
