پکتیکا کې د قراردادي ښوونکو د ګمارنې په موخه آزموینه واخیستل شوه
د پوهنې وزارت_پکتیکا: د پکتیکا ولایت د بیلا بیلو ولسواليو ښوونځیو ته د قراردادی ښوونکو د ګمارلو په موخه د ۲۹ تنو کاندیدانو څخه د آزاد رقابت له لارې آزموینه واخیستل شوه.
هغه غونده، چې د نوموړې از موینې د اخیستلو په موخه د پوهنې ریاست د غونډو په تالار کې جوړه شوي وه د پوهنې ریاست مرستیالانو، د نظارت آمر او د دولتي ادارو یو شمیر مسوولینو ګډون درلود.
په دغه آزموینه کې د نیمه لوړو او لوړو زده کړو فارغانو ګډون کړی وو، چې د یوې رڼې پروسې په پایله کې به ۲۹ تنه د تدریسي رشتې مطابق وړ او مسلکي کسان د قراردادي ښوونکو په توګه د یاد ولایت په بیلا بیلو ولسوالیو په ښوونځیو کې پر دندو وګمارل شي.
د پکتیکا د پوهنې ریاست مرستیالانو هر یو صالح محمد ظفر او عبدالرحیم اسحاق زوی د آزموینې ګډونوالو ته د بشپړ شفافیت ډاډ ورکړ او ژمنه یې وکړه، چې د یو تن حق به هم نه تلف کېږي.
دیاد ونۍ وړ ده، چې دروان کال له شروع تر اوسه پورې په نوموړي ریاست کې د آزادې سیالۍ له لارې یو شمیر ښوونکي په دندوګمارل شویدي.
