د کونړ پوهنې ریاست ته د دیني زده کړو درسي کتابونه ورکړل شول
پوهنې وزارت، کونړ : د پوهنې وزارت له لوري د کونړ ۴۴ دیني مرکزونو ته د نوي نصاب ۴۹۲۸۰ ټوکه درسي کتابونه ورکړل شول.
په هغه غونډه کې چې په همدې موخه د کونړ ولایت مرکز اړوند د شهید محمد هاشم منیب دارالعلوم کې جوړه شوې وه، د کونړ والي محمد اقبال سعید د پوهنې وزارت د دغه اقدام ستایلو ترڅنګ، له دیني عالمانو او زده کوونکو وغوښتل چې د هېواد ساتنې او د ټولنې د پرمختګ په برخه کې خپل مسوولیت ادا کړي.
د کونړ والي وویل: شته پرمختګونه د اوسني نظام له برکته دي، که نظام تقویه کړو نور پرمختګونه به هم رامینځته شي.
نوموړي زیاته کړه، چا چې علم ترلاسه کړ د هېواد او ټولنې پر وړاندې یې مسوولیتونه څو برابره زیاتېږي، نو په کارده چې د ټولنې ټول قشرونه لاس یو کړي او د هېواد له شته کړکیچه را بهر کړو.
همدارنګه د پوهنې رئیس مجیب الرحمن همدرد وویل، د افغانستان د اسلامي زده کړو دغه نوی نصاب د سیمې او نړۍ په کچه پرمختللی نصاب دی، د افغانستان او اسلامي نړۍ لویو عالمانو په مشورې او تر نظر لاندې ترتيب شوی دی.
هغه وویل، دغه کتابونو سره به د دیني زده کړو، مرکزونو ستونزه هواره شي او د ښوونځیو لپاره د کتابونو راجلبولو هڅې به جاري وساتي.
