د ننګرهار ولایت پوهنې رئیس د پوهنې وزارت له اسلامي زده کړو معین سره وکتل
د پوهنې وزارت د اسلامي زده کړو معین مولوي کرامت الله اخندزاده په خپل کاري دفترکې د ننګرهار ولایت له پوهنې رئیس مفتي حبیب حضرت حقاني سره وکتل او دغه راز یې په یاد ولایت کې د اسلامي زده کړو د بنسټونو ستونزې و څېړلې.
په یاده کتنه کې د ننګرهار پوهنې رئیس د تېر کال د رسمي او خصوصي مدارسو د فعالیتونو، لاسته راوړنو، د یاد ریاست د نویو پلانونو، د نوي تشکيلاتي جوړښت د نهايي کېدو، د مدارسو د جوړېدو او له نویو امکاناتو څخه د استفادې په اړه معلومات وړاندې کړل.
د اسلامي زده کړو معین د ننګرهار ولایت د پوهنې ریاست له کړنو او لاسته راوړنو څخه ستاینه وکړه او د یاد ریاست د ښوونیزو کړنو د لا ښه والي په موخه یې د یاد ریاست مشرتابه ته لازمې لارښوونې وکړې.
په ورته مهال نوموړي د پوهنې ریاست اړوند ستونزو په حل کې د همکارۍ ژمنه وکړه.
