له مرکز او ولایتونو څخه د پوهنې ځینې لنډ خبرونه
نيمروز
د نیمروز ولایت پوهنې ریاست د ياد ولایت مرکز اړوند د سیستان لېسې د ۸۰۰ تنو زده کوونکو ترمنځ د سيرت النبي (ﷺ) سیالي ترسره کړې.
د پوهنې رياست مسئولينو وويل، چې د دغه سيالۍ له ترسره کېدو يې اساسي موخه، د اسلام د ستر پيغمبر حضرت محمد(ﷺ) د ژوند او اخلاقو په اړه د زده کوونکو د پوهاوي د کچې لوړول او د اسلامي فرهنګ پراختيا ده.
کندوز
د کندوز ولایت د پوهنې ریاست کارپوهانو، د ياد ولایت د یو شمېر ښوونځیو د ښوونکو د وړتيا لوړولو په موخه، د "اغېزمنې زده کړې د پراختيا" تر عنوان لاندې روزنیز سیمینار جوړ کړ، چې نن د غونډې ګډون والو ته د ستاینلیکونو په وېشلو سره پای ته ورسېد.
همدارنګه
د کندوز ولایت پوهنې ریاست د پلان جوړونې ریاست روزونکو، د ۱۴۰۳ لمریز کال د عملیاتي پلان د تشرېح په موخه، د دغه ولایت د علي آباد ولسوالۍ د پوهنې آمريت کارکوونکو او د ښوونکو مسلکي پراختيا غړو ته دوه ورځنی ورکشاپ جوړ کړ.
کابل
د کابل ښار پوهنې رئيس قاري عبدالباسط حقاني د آتمې ښوونيزې ناحيې د يو شمېر لېسو کړنې وڅېړلې او د درسونو پر کيفيت يې د ټينګار تر څنګ، له ښوونکو او مسئولينو وغوښتل، تر څو خپلې دندې په پوره صداقت او اخلاص سره ترسره کړي.
