د پوهنې وزارت د ساینس مرکز رئیس د کابل ښار له یو شمېر ښوونځیو څخه لیدنه وکړه
د پوهنې وزارت د ساینس مرکز رئیس استاد حبیب الله خالد، د کابل ښار اړوند د نادریه، ناصر خسرو بلخي رسمي لېسو او د شمشاد-- افغان یار نمبر ۱ او نمبر ۲ خصوصي لېسو د درسي لابراتوارونو او وسایلو څخه لیدنه وکړه.
نوموړي په يادو لیدنو کې د دغو لېسو له مسئولينو او زده کوونکو سره د مخامخ ناستو تر څنګ، د ښوونکو د تدريسي مېتودونو، د درسي لابراتوارونو وضعيت، د لابراتوارونو د موادو او وسايلو د کمښت او نورو اړوندو ستونزو په اړه خبرې وکړې او د هغوی د ستونزو او نیمګړتیاوو د حل په موخه یې مسئولینو ته لازمې سپارښتنې وکړې.
په ورته مهال د يادو لېسو آمرینو او ښوونکو د پوهنې وزارت د ساينس مرکز رئیس له ورتګ څخه هرکلي وکړ او نوموړي ته یې ډاډ ورکړ، چې د هېواد بچیانو د ښوونې او روزنې په برخه کې به تر خپله وسه پوره هلې ځلې وکړي او د معیاري تدریس په برخه کې به له هېڅ راز هڅو درېغ ونه کړي.
