په ننګرهار ولایت کې د ۴ بابه ښوونځيو د جوړېدو چارې پیل شوې
د ننګرهار ولایت په کوزکنړ او دره نورو ولسوالیو کې د ۴ بابه ښوونځيو ودانیو جوړولو چارې، د ۳۹ میلیونه۶۳۸ زره ۲۳۸ افغانیو په لګښت، د پوهنې په برخه کې د یو همکار بنسټ په ملاتړ رسما پیل شوې.
د یاد ولایت پوهنې مسئولین وایي: د دغه لېسو له جملې څخه یې «د بډیالي ، توکل بابا لېسې» په کوز کونړ او «قلعه شاهي، املې» لېسې په دره نور ولسوالیو کې موقعیت لري.
د ياد ولايت مقام د بشري سرچینو رئيس مولوي محمد طاهر جلالي په خپلو خبرو کې وويل: د پوهنې په برخه کې هر مثبت ګام د هېواد پرمختګ ګڼل کېږي او ژمنه يې وکړه، چې د پوهنې وزارت د پلانونو په عملي کولو لاره کې به هر ډول همکاريو ته دوام ورکړي.
ورپسې د ننګرهار پوهنې رئيس مفتي حبيب حضرت حقاني د ياد ریاست د کاري راپور د وړاندې کولو په ترڅ کې وويل، چې د تېر کال پر مهال، په یاد ولايت کې ۲۸ بابه نوي ښوونځي جوړ شوي او د پوهنې وزارت مشرتابه په دې برخه کې خپلو همکاریو ته ژمنه ده.
