له ولایتونو څخه د پوهنې څو خبرونو ته کتنه
بغلان:
د بغلان ولایت د پوهنې رئیس الحاج مولوي محمد نور عزیزي په وینا، د پلخمري ښار اړوند کرکر منځني ښوونځي بیارغونې چارې، چې د یو همکار بنسټ په مالي مرسته پیل شوې وې، اوسمهال بشپړې شوې دي.
د ياد ښوونځي د ودانۍ پر بيارغونه شاوخوا يو مېليون افغانۍ لګښت راغلى دى.
ننګرهار:
د ننګرهار ولایت پوهنې رئیس مولوي عزیزالله مصطفی، د نورستان ولایت د مقام له مرستیال مولوي فیصل مختار سره په لیدنه کې، د دواړو ولایتونو د ښوونیز وضعیت په اړه مشورې او نظرونه تبادله کړل.
هرات:
د هرات ولایت په مرکز کې د بابا زنګي لېسې د فوټسال لوبغالی، د یاد ولایت د پوهنې رئیس مولوي رحمت الله جابر په حضور کې پرانیستل شو.
د یاد لوبغالي په رغونې ټولټال ۵۰۰ زره افغانۍ لګښت راغلی، چې د همدغه ولایت د یو تن معارف دوست سوداګر له خوا ورکړل شوی دی.
بدخشان:
د واليبال هغه سیالۍ چې د بدخشان ولايت مرکز فيض آباد ښار د زده کوونکو ترمنځ پيل شوې وې، په پایله کې یې د بتاش عالي لېسې سپورټي لوبډلې لومړی مقام خپل او د مسئولینو له لوري ورته سپورټي ډالۍ ورکړل شوې.
