د کابل ولایت او ښار د مدرسینو مسلکي پراختیا غړو لپاره مسلکي سیمینار پای ته ورسېد
هغه ۶ ورځنی سیمینار چې څه موده وړاندې د پوهنې وزارت د اسلامي زده کړو معینیت له لوري، د کابل ښار او ولسوالیو د مدرسینو د مسلکي پراختیا ۸۰ تنو علمي غړو وړتیا لوړولو په موخه په لاره اچول شوی و، د یوې پرتمینې غونډې په ترڅ کې د اسلامي زده کړو د معین، مرکزي رئیسانو، د کابل ښار او ولایتونو د پوهنې مسئولینو په حضور سره پای ته ورسېد.
دپوهنې وزارت د اسلامي زده کړو معين الحاج مولوي کرامت الله آخندزاده د دغه سيمينار پر ارزښت دخبرو په ترڅ کې ګډون والو ته وويل: هغه څه چې په دې سيمينار کې مو زده کړل ستاسو مسئوليت دى چې په مدارسو کې يې خپلو استادانو او زده کوونکو ته ورسوئ.
نوموړي زیاته کړه، له هغو مهارتونو چې تاسو دلته زده کړل، د تعلیمي کیفیت د لوړوالي په موخه منظم پلانونه جوړ کړئ، ترڅو تدریسي کیفیت د امکان تر حده لا پسې لوړ شي او د یاد سیمینار له زده کړو مهارتونو څخه د طلابو د زده کړې پروسې ښه کولو لپاره ګټه پورته کړئ.
هېره دې نه وي چې د غونډې په پای کې ګډون والو ته تقدیرنامې هم ورکړل شوې.
