د کابل ښار اړوند ښوونځیو د لابرانت ښوونکو وړتیا لوړولو سیمینار پیل شو
د پوهنې وزارت د کړنلارې له مخې، د کابل ښار پوهنې ریاست د ۱۶ ښوونیزو ناحیو اړوندو ښوونځیو د لابرانت ښوونکو د مسلکي وړتیا لوړولو په موخه، ۱۲ ورځنی میتودیک سیمینار په لاره واچاوه.
د ياد سيمينار د پرانيستې په مراسمو کې د پوهنې وزارت د ښوونیز نصاب او د ښوونکو مسلکي پراختیا لوی رئيس الحاج مولوي اول ګل ايوبي، د ياد ریاست يو شمېر نورو مسئولینو او کارکوونکو هم برخه اخیستې وه.
غونډه د قرآن کریم د څو مبارکو آیتونو په تلاوت سره پيل شوه؛ ورپسې د ساینس مرکز رئیس استاد حبيب الله خالد ګډون والو ته د ښه راغلاست ترڅنګ، د یاد سيمينار د موضوعاتو او اهمیت په تړاو معلومات وړاندې کړل او زیاته یې کړه، چې په دې سیمینار کې به د کابل ښار د ۱۶ ښوونیزو ناحیو اړوند شاوخوا ۱۵۰ تنو لابرانت ښوونکو ته د ساینسي مضمونونو (کیمیا، فزیک، بیولوژي، ساینس او کمپیوټر) برخو کې روزنه ورکړل شي.
ورپسې د ښوونیز نصاب او د ښوونکو د مسلکي پراختیا لوی رئیس هم د دغه ډول سیمینارونو د جوړولو او د پوهنې ریاست د کارکوونکو د وړتیاوو لوړولو په تړاو خبرې وکړې او له ګډون والو یې وغوښتل، تر څو د یاد سیمینار له محتوا څخه اعظمي ګټه پورته کړي.
له بلې خوا د ښوونځیو د لابراتوارونو مسئولینو هم د عملي درسونو او له نویو میتودونو سره د هغوی د آشنا کولو په برخه کې د پوهنې وزارت د مشرتابه له پاملرنې مننه او قدرداني وکړه.
د يادونې وړ ده، دغه سيمينار د پوهنې په برخه کې د یو همکار بنسټ په ملاتړ په لاره اچول شوی دی، چې ١٢ ورځې به دوام ولري.
غونډه د دعائیې په لوستلو سره پای ته ورسېده.
