دپوهنې وزارت سرپرست وزیر د یونیسف له عمومي مسئولې اغلې کترین روسیل  سره وکتل

  دپوهنې وزارت سرپرست وزیر شیخ القرآن والحدیث الحاج مولوي نورالله منیر صاحب، تر غرمې مخکې  د یاد وزارت  د مقام په دفتر کې د یونیسف له عمومي مسئولې اغلې کترین روسیل(Catherine Russell)، د یونسیف له مرستیال  ښاغلي عمرعابدي،  د افغانستان لپاره د ملګرو ملتونو مسئولې اغلی ډیبورا لاینز(Debora Lyons)، د افغانستان لپاره د یونیسف مسئول ښاغلي محمد ایویا (Mohamed Ayoya)، د افغانستان لپاره د یونیسف مرستیالې اغلې الیز  اکونګا(Alice AKunga)، د افغانستان لپاره د یونیسف تعلیمي مسئولې  اغلې جینت اوجیلار(Jeanette Vogelaar) او مل هیئت سره  وکتل.
د ملاقات په پیل کې محترم وزیر صاحب  راغلیو میلمنو ته  ښه راغلاست ووایه  او د افغانستان په تعلیمي ډګر کې یې د یونیسف له مرستو څخه مننه وکړه. نوموړي زیاته کړه چې اسلامي امارت د خپل هیواد مادي او معنوي پرمختګ ته ژمن دی او طبیعي  خبره ده چې دغه پرمختګ له تعلیم څخه شروع کېږي. 
اغلې کترین روسیل  د خپلو خبرو په ترڅ کې له اسلامي امارت څخه مننه وکړه،  چې د خپل ملت تعلیمي حقوقو ته ژمن دی  او زیاته یې کړه ، چې یونیسف به په تعلیمي ډګر کې افغانستان یوازي نه پریږدي.