د دایکنډي ولایت د ښوونکو مسلکي پراختیا علمي غړو لپاره د وړتیا لوړولو سیمینار پیل شو
د دایکنډي ولایت پوهنې ریاست روزونکو له خوا د ښوونکو مسلکي پراختیا ۸۹ تنو علمي غړو لپاره د وړتیا لوړولو ۸ ورځنی سیمینار پیل شو.
یاد سیمینار چې د پوهنې وزارت سره د یوې همکارې ادارې په مالي او تخنیکي ملاتړ سره تنظیم شوی، موخه یې په اداري او تدریسي ادارو کې د هغوی د مسلکي وړتیاوو لوړول دي، ترڅو علمي غړي د نويو او معیاري تدریسي مېتودونو سره بلد شي.
د دایکنډي ولایت پوهنې رئیس الحاج مولوي رحمت الله قندیلي ګډونوالو ته د ښه راغلاست ترڅنګ، د دې سیمینار منځپانګه ګټوره وبلله او ویې ویل: "دا ۸ ورځنی سیمینار د ښوونکو ۸۹ تنو علمي غړو لپاره پیل شوی، چې وروسته به همدغه وګړي د ولایت په کچه د ښوونځیو ۸۰۰ تنو ښوونکو ته روزنه ورکړي.
نوموړي زیاته کړه: همدغه سیمینار به د ۳ ورځو په موده کې په ځانګړي ډول د ښوونځیو آمرینو او مدیرانو او د ښوونځیو شوراګانو غړو لپاره هم ترسره شي، چې یو تن مرکزي مسئول او د هرې ولسوالۍ څخه یو تن د شورا غړی به پکې ګډون وکړي. "دا اشخاص به د ښوونځیو ۲۵۰ تنو مسئولینو او ۵۰۰ تنو د شورا غړي وروزي او موږ کولی شو ووایو چې په ټولیزه توګه ۱۵۵۰ تنه ښوونکي، آمرین، مدیران او د ښوونځیو شورا غړي به له دې روزنیز پروګرام څخه ګټه پورته کړي."
