د لوګر ښوونځیو ته د لابراتواري توکو مرسته وشوه
پوهنې وزارت_لوګر: د لوګر ولایت د ښوونځیو زده کوونکو ته د عملي زده کړو د زمینې برابرولو په مقصد د لابراتواري توکو مرسته وشوه.
یاده مرسته د پوهنې وزارت د ساینس او ښوونیزې ټکنالوژۍ ریاست کړې ده، چې شاوخوا ۱۱۶ زره افغانۍ ارزښت لري.
په دغه مرسته کې ۲۳ قلمه لابراتواري توکي، ۵۰۰ ټوکه د ساینسي مضمونونو د تجربوي زده کړو لارښود کتابونه او ۳۰ لوی میزونه شامل دي.
یاده مرسته په ښوونځیو کې زده کوونکو ته د ساینسي مضمونونو په برخه کې د عملي زده کړو زمینې برابرولو په موخه شوې ده.
د لوګر د پوهنې رئیس عبدالوکیل کلیوال پر یادې مرستې خوښي څرګنده کړه او زیاته یې کړه، چې په دې مرستې سره به د ډېرو ښوونځیو د لابراتواري توکو د نشتون ستونزه هواره شي.
هغه وویل، چې د ۲۷۳ ښوونځیو له جملې د ۱۲۰ ښوونځيو زده کوونکو ته یې د عملي زده کړو لپاره لازم وسایل او امکانات برابر کړي او زده کوونکي ورڅخه عملآ ګټه پورته کوي.
د یادونې وړده، چې پوهنې وزارت په تېرو کلونو کې هم د لوګر د زیات شمېر ښوونځیو لپاره د لابراتوارونو مرستې کړي دي.
