له ولایتونو څخه د پوهنې څو لنډ خبرونه
تخار
د تخار ولایت ینګي قلعه ولسوالۍ اړوند د جلګې هلکانو لېسې د (۶۵) متر مربع په اوږدوالي احاطوي دېوال، د ۶۵ زره افغانیو په لګښت، د یاد ښوونځي د شورا په مالي مرسته جوړ او ګټې اخیستنې ته وسپارل شو.
همدارنګه
د تخار ولایت ینګي قلعه ولسوالۍ اړوند د توغي قشلاق منځني ښوونځي د ۳۱۰ متره په اوږدوالی احاطوي دېوال د بنسټ ډبره، د ۲۸۰ زره افغانیو په لګښت د خلکو په مرسته او د ښوونځي د شورا په همکارۍ کېښودل شوه.
میدان وردګ
د میدان وردګ ولایت پوهنې ریاست د یو همکار بنسټ په مرسته، «د ښوونکو لپاره د ښوونې او روزنې اغېزمن پروګرام» تر سرلیک لاندې، د یو شمېر ښوونځیو ښوونکو او د ښوونکو د مسلکي پراختیا علمي غړو ته ۱۲ ورځنی میتودیک ورکشاپ په لاره واچاوه.
کندوز
په کندوز ولایت کې د ښوونکو د مسلکي پراختیا علمي غړو او د ۲۰ بابه ښوونځیو ښوونکو ته د "اغېزمنې زده کړې تدریس" تر سرلیک لاندې، د وړتیا لوړونې ۱۲ ورځنی روزنیز پروګرام پیل شو.
