په فارياب ولايت کې د درې بابه ښوونځيو لپاره بنسټ ډبره کېښودل شوه
په فاریاب ولایت کې د یو لړ ځانګړو مراسمو پر مهال د درې بابه ښوونځیو د بنسټ ډبره کېښودل شوه:
۱- د یاد ولایت دولت آباد ولسوالۍ اړوند په جوقای کلي کې د یو باب ښوونځي د ودانۍ بنسټ ډبره له ټولو ملحقاتو سره د ۱۶،۷ میلیونه افغانیو په ارزښت کېښودل شوه.
۲- د سبزپوش ولسوالۍ په اړوندو کې د دویم ښوونځي د ودانۍ له ټولو ملحقاتو سره د بنسټ ډبره د ۱۲.۹ میلیونه افغانیو په لګښت سره کېښودل شوه.
۳- د سبزپوش ولسوالۍ د پوسته قلعه ښوونځي لپاره د بنسټ ډبره له ټولو ملحقاتو سره د ۱۶.۴ میلیونه افغانیو په لګښت سره کېښودل شوه.
د یادو ښوونځیو ټولیز لګښت ۴۶ میلیونه افغانۍ اټکل شوی، چې د پوهنې د يو ملاتړ بنسټ له خوا ورکول کېږي.
په دې اړه جوړو شویو مراسمو کې د پوهنې په رئیس مولوي محمد طاهر جواد سربېره، د فاریاب ولایت د سیمه ییزو ادارو یو شمېر مسئولینو او علماوو هم حضور درلود.
د یاد ولايت پوهنې رئيس د خبرو پرمهال په ټول هېواد کې د ماشومانو لپاره د پوهنې وزارت د متوازنو ښوونيزو او روزنيزو خدمتونو وړاندې کولو ته په اشارې سره له خلکو وغوښتل، تر څو د پوهنې وزارت له پلانونو څخه مادي او معنوي ملاتړ وکړي.
همدارنګه نوموړي د پوهنې له مسئولینو او زده کوونکو څخه وغوښتل، چې د ښوونځیو ترمیم او تجهیزاتو ته پاملرنه وکړي.
له بلې خوا د يادو سيمو اوسېدونکو د هېواد د پوهنیز نظام د پراختيا او پرمختګ په برخه کې د پوهنې وزارت د مشرتابه هڅې وستايلې او په دې برخه کې يې د پوهنې رياست له پلانونو او پروګرامونو څخه خپل ملاتړ څرګند کړ.
