پوهنې سر پرست وزیرې د ولسي جرګې د دیني او فرهنګي چارو د لوړو زده کړو او معارف کمیسیون په غونډه کې ګډون وکړ
پوهنې وزارت، کابل: د پوهنې وزارت سر پرستې آغلې رنګینې حمیدي او ورسره پلاوی د ولسي جرګې د دیني او فرهنګي چارو، لوړو زده کړو او معارف کمیسیون په غوښتنه د دغه کمیسیون په غونډه کې برخه واخیسته.
د ولسي جرګې د نوموړي کمیسیون رییس او غړو یې د حق الزحمه ښوونکو، د ښوونکو کمبود، د ګمارنې ستونزو او د ستراتیژیکو مطالعاتو د مرکز د ګزارش په اړه خپل نظریات شریک او په دې اړه یې توضیحات وغوښتل.
آغلې حمیدي د موضوع په اړه یاد کمیسیون ته مفصل معلومات ورکړل زیاته یې کړه: پوهنې وزارت د ټولو ننګونو اوستونزو د ختمولو لپاره قوي هوډ لري او په دې برخه کې د مجلس د استازو او په تیره د معارف، لوړو زده کړو او فرهنګي چارو د کمیسیون لار ښوونې به په پام کې ولري.
آغلې حمیدي د ښوونیز نصاب بیا کتنه د وخت او شرایطو د اړتیا سره سم یو جدي ضرورت په ګوته کړ زیاته یې کړه: پوهنې وزارت د دې ترڅنګ چې ملي او اسلامي ارزښتونه پام کې لري هڅه یې کړې ده تر څو ښوونیز نصاب معیاري، او ورځنیو اړتیاوو سره سم د هیواد د بچیانو لپاره بیا ځلي پرې کتنه او تدوین کړي.
آغلې حمیدي څرکنده کړه:د هیواد په ښوونیز ڼصاب کې یوه څه ستونزې شتون درلود چې په نوې کتنه کې ځینې یې د درسي مفرداتو څخه لري شوي دي چې اوسمهال ښوونیز نصاب د حجم، انسجام، منځ پانګې او ارزښت له پلوه د معیاري کیدو په خوا روان دی.
