د پکتیا د پوهنې ریاست او د شپـږو ولسوالیو د پوهنې مسوولینو تر مینځ د همغږۍ غونډه ترسره شوه
د پوهنې وزارت، پکتیا: د پکتیا ولایت د پوهنې رییس استاد کوچي ځاځي په مشرۍ یو پلاوي په څمکنیو ولسوالۍ کې د شپږو ولسوالیو (څمکني، پټان، آریوب ځاځي، لجه منګل، احمدخیل او جانیخیل) په کچه د ستونزو اورېدو او همغږۍ غونډه وکړه.
د غونډې په پیل کې د څمکنیو ولسوالۍ د پوهنې آمر محمدشریف دانش راغلو میلمنو ته ښه راغلاست ترڅنګ د پوهنې ریاست د چارو او رهبرۍ ستاینه وکړه او د غونډې په جوړیدو یې خوښي څرګنده کړه ورپسې د پټان ولسوالۍ د پوهنې آمر نجیب الله فطرت دیادې ولسوالۍ ستونزي بیان کړي.
د آریوب ځاځیو ولسوالۍ د پوهنې امر ګل اغا باتوري وینا وکړه او وویل چې د پوهنې ریاست په هڅو او د ولس په کلک ملاتړ وتوانېدو چه ځينې ښوونکي په افتخاري ډول او ځینې بیا د ولس په معاش ورکړه په دندو و ګمارو او تدریسي بهیر په عادي ډول روان کړو.
ورپسې د جاني خیلو ولسوالۍ د څارنې آمر عبدالغفور د پوهنې ریاست له هغو چارو څخه مننه وکړه چه د جانخیلو په ولسوالۍ کې یې ترسره کړی دي لکه د ښوونځیو د ودانیو جوړیدل، کمپوټر لیبونو جوړیدل او داسې نور.
همدارنګه د لجه منګل ولسوالۍ په استازیتوب آمر بخترګل رحماني په لجه منګل کې د شویو پرمختګونو ته په اشارې سره ځینې وړاندیزونه درلودل لکه د کار لاندې پروژو ژر ترسره کېدل او ځینې نیمګړتیاوو پوره کول همدارنګه د احمدخیلو ولسوالۍ د پوهنې آمر سیف الله خالد وینا وکړه او د احمدخیلو په ولسوالۍ کې یې د متوازن پرمختګ غوښتنه وکړه او بیا د څمکنیو ولسوالۍ د مقام په استازیتوب د سکټور مدیر مدیرخان خبرې وکړې او په ولسوالۍ کې یې د پوهنې په برخه کې د چارو په ښه ترسره کېدو خوښي څرګنده کړه او د ولسوالۍ مقام له اړخه یې د هر قسم همکارۍ او ملاتړ ډاډ ورکړ.
په پای کې د پوهنې رییس استاد کوچي ځاځي د ګډونوالو ټولو غوښتنو ته ځوابونه وویل او هم یې ځینې سپارښتنې له ګډونوالو سره شریکې کړې.
