له ولایتونو څخه د پوهنې خبرونه
ننګرهار
د ننګرهار ولایت د پوهنې رئیس مفتي حبیب حضرت حقاني د دې ولایت د خوګیاڼو ولسوالۍ د سور ډاګ لېسې د اداري او تدریسي چارو څارنه وکړه.
په دې کتنه کې يې د لېسې د ښوونکو او زده کوونکو ستونزې واورېدې او د حل ژمنه يې وکړه.
یاده لېسه له څو کلونو راهيسې غير فعاله وه او په دې وروستيو کې د پوهنې رياست او د ځایي خلکو په مرسته بېرته فعاله شوه.
پروان
د پروان ولایت د پوهنې رئیس مفتي محمد حسن حقاني د دې ولایت د مرکز او ولسوالیو د ادارو له آمرینو سره ناسته وکړه.
په دې کتنه کې یې د دې ولایت د ښوونځیو او مدارسو د ښوونیزو چارو د ښه والي په اړه ورسره خبرې وکړې.
لوګر
د لوګر ولایت د برکي برک ولسوالۍ د پوهنې آمر د دې ولسوالۍ د ۴۵ ښوونځیو له آمرینو او مدیرانو سره د لیدنې پر مهال هغوی ته د ښوونکو، کارکوونکو او زده کوونکو د احصاییې د راټولولو په اړه لازمې لارښوونې وکړې.
بلخ
د مارمل ولسوالۍ د پوهنې آمر له خپلو کارکوونکو سره په کاري ناسته کې له هغوی وغوښتل، چې د زده کوونکو د علمي کچې د لوړولو او د پوهنې په ځینو برخو کې جدي هڅې وکړي.
همدارنګه د دهدادي ولسوالۍ د پوهنې آمر د دې ولسوالۍ په اداري غونډه کې چې د ولسوال مولوي اسلام الدین خالد په مشرۍ جوړه شوې وه ګډون وکړ او په یاده ولسوالۍ کې یې د پوهنې پر فعالیتونو، ستونزو او اړتیاوو خبرې وکړې.
