چین در امر مبارزه با ویروس کرونا؛ با معارف افغانستان همکاری می‌کند
وزارت معارف، کابل: محترمه رنگینه حمیدی سرپرست و نامزدوزیر وزارت معارف با محترم وانگ یو، سفیر جمهوری خلق چین دیدار نمود.
این نشست که به روز دو شنبه تاریخ ۲۷ اسد در قصر دلکشا انجام یافت، محترم محمد شاکر کارگر رئيس عمومی دفتر مقام عالی ریاست جمهوری نیز در آن حضور داشت.
آقای وانگ یو، با اشاره به طرح وزارت معارف مبنی بر آغاز مکاتب سر از اول سنبله، از تعهد کشورش در حمایت از برنامه‌های دولت جمهوری اسلامی افغانستان اطمینان داده گفت که کشور چین حدود ده ملیون ماسك را به معارف افغانستان مساعدت می‌نمايد و سلسله این کمک‌ها همچنان ادامه خواهد یافت تا متعلمين ساير ولايات افغانستان از آن مستفيد شوند.
محترمه رنگینه حمیدی سرپرست و نامزدوزیر وزارت معارف و محترم محمد شاکر کارگر رئيس عمومی دفتر مقام عالی ریاست جمهوری از همکاری‌های همیشگی کشور دوست جمهوری خلق چین اظهار امتنان و قدرداني نموده گفتند که این کمک‌ها می‌تواند در امر مبارزه با ویروس کرونا برای معارف افغانستان موثر واقع شود.
