د پوهنې وزارت د نشراتو او عامه اړیکو د ریاست نوی رئیس معرفي شو

د پوهنې وزارت د نشراتو او عامه اړیکو د ریاست نوی رئیس مولوي سید محمود هاشمي د یاد وزارت د دفتر د عمومي رئیس عزيز احمد ریان له لورې د نشراتو ریاست کارکوونکو ته رسما معرفي شو.
مولوي سید محمود هاشمي د بادغیس ولایت د بالامرغاب ولسوالي اوسیدونکی دی، د اسلامي امارت د حاکمیت په تیره دوره کې یې د مسلحانه مبارزې تر څنګ د غور ولايت د ښاروال په توګه دنده اجرا کوله. په تيره شل کلنه دوره کې یې د نظامي جهاد تر څنګ يوولس کاله د بادغیس ولایت د صحت په برخه کې دنده درلوده. د اسلامي امارت د مجاهدينو په لاس د کابل تر فتحې وروسته د کابل ښاروالي د څلورمې ناحیې د رئیس په توګه وټاکل شو. په دې وروستیو کې د پوهنې وزارت د مشرتابه په وړانديز او د رياست الوزراء د محترم مقام د منظوري په اساس د نشراتو او عامه اړیکو د رئیس په توګه وګمارل شو.