په ننګرهار کې د زنګ په کړنګولو سره نوي تعلیمي کال پیل شو
د پوهنې وزارت_ننګرهار: د ننګرهار ولایت د تودو سېمو د ښوونځیو نوی تعلیمي کال په ولسي او سیاسي چارو کې د ولسمشر ستر سلاکار او د ننګرهار والي ضیاالحق امرخیل، پوهنې ریس حسیب الله شینواري له لورې د زنګ په وهلو سره پېل شو.
په هغه غونډه کې چي د جلال آباد ښار د بي بي حوا په لیسه کې جوړه شوی وه د پوهنې ریس حسیب الله شینواري په خپلو خبرو کې له ننګرهار والي مننه وکړه چې د معارف چارو ته په خپل کاري مهال ویش کې لومړتیوب او د پروګرامونو ملاتړ وکړي.
همدارنګه د ننګرهار والي ضیا الحق امرخیل په خپلو خبروکې وویل: د افغانستان د خلاصون او پرمختګ یوازینۍ لار علم او معارف دی او که غواړو چې افغانستان له دې اوسنیو کړکیچونو راوباسو نو باید علم زده کړو.
د بي بي حوا لېسې یوې زده کوونکې مروا د نورو زده کوونکو په استازولۍ د ننګرهار له والي څخه د امنیت راوستو او دغه راز په لرې پرتو سیمو کې د ښځینه ښوونکو او نجونو زده کوونکو ستونزو حل ته پاملرنه وکړي او زده کوونکو ته د کتابونو او نورو اسانتیاوو په برابرولو کې کوټلي ګامونه پورته کړي.
