د پوهنې وزارت د پراختيايي کارکوونکو د مسلکي وړتياوو لوړولو ورکشاپ پای ته ورسېد
د پوهنې وزارت د پراختیایي کارکوونکو د مسلکي وړتیاوو د لوړولو په موخه دوه ورځنی ورکشاپ، د پوهنې وزارت د بېلابېلو څانګو د مسئولينو او کارپوهانو له لوري د پرېزنټېشنونو او علمي بحثونو وړاندې کولو وروسته په بریالیتوب سره پای ته ورسېد.
د پوهنې وزارت د کیفیت تضمین معین مولوي عبدالخالق صادق د خپلو خبرو پر مهال، د ښوونې او روزنې په برخه کې د کيفيت پر لوړوالي ټينګار وکړ.
نوموړي په هېواد کې راغلی سرتاسري امنيت يو الهي نعمت وباله او څرګنده يې کړه، چې له دې لاس ته راغلي فرصت څخه بايد د پوهنې نظام لاښه والي په برخه کې اعظمي ګټه پورته کړو.
د ورکشاپ په دوو ورځو کې د پوهنې وزارت د ښوونې او روزنې، اسلامي زده کړو، د کیفیت تضمین، سرچينو او ادارې معينتونو کارپوهانو، هر يوه د خپلې موضوع اړوند پرېزنټېشنونه وړاندې کړل او د ورکشاپ د ګډون والو پوښتنو ته يې لازم ځوابونه ورکړل.
په پایله کې، د ورکشاپ پايلې او لاس ته راوړنې د ګډون والو د ځانګړې پاملرنې او علاقې وړ وګرځېدلې او په راتلونکي کې يې د دا ډول غونډو د دوام غوښتنه وکړه.
ياد ورکشاپ د دعائیې په لوستلو سره پای ته ورسېد.
