له ولایتونو څخه د پوهنې څو لنډ خبرونه
کابل
د کابل ولایت پوهنې ریاست وايي، د یاد ولایت د څوارلسو ولسوالیو ښوونځیو ته یې د اسلامي زده کړو د درسي کتابونو، درسي توکو، خېمو، فرشونو او نورو اړینو موادو د وېش لړۍ پیل کړې ده.
لوګر
د لوګر ولایت پوهنې ریاست د یاد ولایت د ۲۹۳ بابه مدارسو او دارالحفاظونو ۶۰۰ تنه استادانو او مسئولینو ته څلور ورځنی ښوونیز سیمینار جوړ کړ.
په یاد سیمینار کې د پوهنې رياست روزونکو په اداري او تدريسي چارو کې ګډون والو ته روزنه ورکړه.
غزني
د غزني ولایت پوهنې ریاست د یو همکار بنسټ په مالي مرسته، د یاد ولایت د مقر، ګیلان، واغظ او خواجه عمري ولسوالیو د ښوونکو او زده کوونکو لپاره د درسي توکو بستې او کتابونه ووېشل.
هلمند
د هلمند ولایت پوهنې ریاست د نوزاد ولسوالۍ د ۴۵ بابه مدارسو او دارالحفاظونو د مسئولینو او ښوونکو لپاره یو ورځنی ښوونیز سیمینار جوړ کړ.
په یاد سیمینار کې د پوهنې رياست روزونکو کارکوونکو ته په اداري او تدريسي چارو کې روزنه ورکړه.
بغلان
د بغلان ولايت پوهنې رياست اداري غونډه د یاد ولايت د پوهنې رئيس الحاج مولوي محمد نور عزيزي په مشرۍ، د سيمه ييزو رياستونو د مسئولينو او د مرستندويه بنسټونو د استازو په ګډون جوړه شوه.
