په هرات ولایت کې د یو باب ښوونځي ودانۍ ګټې اخیستنې ته وسپارل شوه
د هرات ولایت پوهنې رئیس مولوي رحمت الله جابر، د پوهنې مسئولینو، علماوو او ښوونکو په حضور کې، د یاد ولایت پښتون زرغون ولسوالۍ د ابو سعید الخدري (رضي الله عنه) لومړني ښوونځي اړوند ودانې پرانیستله.
د ښوونځى دغه ودانۍ په دوه جرېبه ځمکه کې جوړه شوې او ياده ځمکه پخوا د پښتون زرغون ولسوالۍ د يوه وتلي علمي شخصيت الحاج عبدالرزاق محمدي له خوا پوهنې لپاره وقف شوې ده.
یاده ودانۍ ۸ درسي ټولګي له اړینو ملحقاتو سره لري، چې ټولټال ۲ مېلیونه ۲۶۸ زره افغانۍ لګښت پرې راغلی دی.
د يادونې وړ ده، چې د همدغه لومړني ښوونځي د جوړېدو لګښت هم د یاد علم پروره شخصیت له خوا ورکړل شوى دى.
د پوهنې وزارت مشرتابه په هرات ولایت کې د الحاج عبدالرازق له خوا د یوه لومړني ښوونځي د جوړېدو په ګډون د هېواد د پوهنې په برخه کې د افغانستان د خلکو له مرستو مننه کوي.
